Saytan sḭ go, ndu ge 1- ho̰l, bage gaage. Ne Baybul zi, Saytan a bage ne ke ho̰l ne Dok, a o̰yom ge seŋgre ma ga̰l ne. Na temel ge baŋlaŋ a ker ho̰l ne naa ge Dok ne ma, tele nama be ge ker laar ɓyareya ge bama Bageyal Jesu-Krist ne. Na son ma no kwaɗa lwak:
1- Ɓyare kat ga̰l
Kaŋ ge Saytan ne e naa zi ge ɓaŋlaŋ a byare ga̰l. Ne jo̰ na sḛ ke
ho̰l ne Dok ndwara go na ka ga̰l, a ka uware nà dimma ne na go. Naa ge Saytan ne ma ɓyare kat naa ndwara zḛ ne uware pala pe, ne jegreya pe, a be ne ke fare a̰me ge hon Dok ga̰l pe to, no a dwatɗa ge ndu ge Saytan ne ne. « Guwa̰r ga̰l ge cya̰wak pala ge serra cicim, te ke gyana mo ba det ne digi ya se ɗaa? Mo ge mo ne ka burmi suwal ma. Mo ka jan tene go: «Mbi mbo ɗur mbi hool gan ge guwa̰r ge Dok ne ma pala digi ya. Mbi mbo kat mbi pe ge njal pala digi, swaga ɓol ta ge dok ma ne go, le kuu ya ndit. Mbi mbo ndé ge pḭr ma pala digi, mbi mbo kat dimma ne Bage ne digi digi ma zi ya go.» Ndi ne se no, a cigi mo ja táál ge siya ma ne se, ge tuul pe ge ndegɗe se ya.» Isaya 14 :12-15 A Saytan jya̰ Hawa ne go, kadɗa nama zam uwara ge Dok ne tele nama ne na ta ya, nama mbo hat dimma ne Dok go, no a dwatɗa ge ɓyare ga̰l, ɓyare kat ne pala hini be ge ndu dol na ndwara mo pal to. Bom jan gwale go: «A go to, aŋ sú to bat. Amma Dok kwa kwa go, dam ge aŋ ne mbo zam na ya, aŋ ndwara fa̰r ma mbo tyan, aŋ mbo gá dimma ne na ge Dok go, ge kwar kwaɗa ma ne sone.» Pe eya 3: 4-5.
2- Laar wan kaŋ dunya
byare kat ga̰l
Laar wan kaŋ dunya
A bage ho̰l Saytan wat tene ge naa dasana ma zi ne, naa á ta kaŋ dunya pe go no, naa vyale be ge ker laar ɓyareya ge Dok ne no. Laar wan kaŋ dunya é naa a̰me ma hun siya, ne ker ta sḛ yál, ne vḛne ta ne bama kaam ma, ne ker kaŋ ge yak ge Dok ne ɓyare nama to ma. A na ge maktub
ge Dok ne ne jan go nee ke haŋgal ne naa hir ge go mbe ma. «Nee wa̰ naa ne ndwara, nee ba hun nama, nee teme nama mbo taal ge siya ma ne se ne mo jo̰ nee siya ma ne go. Nee mbo ɓol kaŋ kwaɗa ma pe hini hini, nee mbo wi nee zok ma ne kaŋ paal ma. Mbo ya mo ma̰ ɓol mo ne ndwara, nee e nee kaŋ ma dagre» Mbi vya, mbo swaga dagre ne nama to, abe tene uzi ne nama koo pul go.» Fare sḭ ma 1:12-15
«Ago too ge sone kerra ge daage ne a laar wan bware, a̰me ma swaga olbe yan pe go, a ya̰me uzi ne viya̰ ge dosol go, a zut bama pala kwakwak ne yál tiɗiya ma gḛ.» 1 Timotawus 6:10.
Laar wan kaŋ dunya ban naa da ne viya̰ ge Dok ne go.
3- Ene ge sḛ duur ne
No uwale, a kaŋ ge Saytan ne e na naa dasana ma zi ne ne vḛne ta pe, a be ne detɗa ya kwaɗa go pe to, ndwara go laar ɓyareya ge Dok ne go to. A na no, ene ge nama ne zi, a ka ɗaabeya kaya ge bama ne zi. A gá dimma ne moy go. Be ge a ɓol ndu-gwale to, a fí dam to. Ko ndu-gwale be ge ɓol ndu-son to, fí dam to. Dok tele kaya kerra tele. «Gwale kaya a tuul ga̰l ne, gwale ge ɗogle a tuul ge wak gorse ne.» Fare sḭ ma 23:27 «ndu ge ne wat naa zaab ge kaya ma pe zi, ban na kaŋ kwaɗa ma.» Fare sḭ ma 29: 3 Maktub ge Dok ne jan fare ma gḛ ho̰l ene ge sḛ duur ne pal. Dok ho̰l ne naa ge kaya ma, ne naa ge ne mbo naa ge kaya ma pe zi ma.
4- Varseya ma
Bage ho̰l temel ge ɓaŋlaŋ ge ne ke na ne naa ge Dok ne ma buwal zi a varseya. Kat dagre, kat ba̰a̰n ne ta, Saytan ɓyare na to. Ago swaga ge naa ne kat ne ho̰l ta buwal zi, ko naa ne kat varseya no a na tuli ne. Ne jo̰ na sḛ caɗe tene da ne maleka ge Dok ne ma buwal zi ne pala ga̰l ge na ne pe, go no me, ɓyare go naa ka varseya zi, ho̰l ne ta, vḛneya zi, ne caɗeya zi. Da ne pe no, swaga ge ná vya ma ne kat dagre, bage ho̰l wat fare nama zi, e nama caɗeya. A be ná vya ma buwal zi ɗeŋgo to, ko obe ma ne na gwale buwal zi, ko vya ma ne na bá ma buwal zi, ko Dok vya ma buwal zi.
Varseya ne gool
Dok ɓyare go naa ka ɗu, laar wanna zi. Jesu kaɗe na Bá Dok ne na naa ge hon fareba ma pe pet, nama ka ɗu dimma ne bama ne na bá ne ka ɗu go. «ne da pe, nama pet nama ka ɗu, dimma ne nee ne mo go, Báá, mo ya mbi zi, mbi me mbi ya mo zi, ne da pe, nama sḛ ma me, nama ka ɗu nee zi, go no, dunya ma ho̰ fareba go mo teme mbi ya ne.» Yohana 17:21
5- Gaage ma
Temel ge Saytan ne ge ɓaŋlaŋ a gene gaage ma, ne gool ma, ne or ta ma ne kaŋ ge seŋgre ge daage ma pe ya ná vya ma buwal zi, ne da pe, nama ka swaga kwaɗa to, tuli zi to me. No a na temel ge ne ke kretien ma buwal zi ne. Ne jo̰ ne pe dolla ya day, na sḛ ke ho̰l da ne Dok, ɓyare go naa ka ho̰l ne ta, go no, ba ka ker na sḛ tuli. Ndu ge daage pet ge na laar ne wa̰ gool, ne é varseya ná vya ma buwal zi, ne kat ne or na kaam, a be ge Dok ne ne to, amma a kaŋ temel ge bage ho̰l Saytan ne ne. Dok ɓyare kaŋ hir mbe ma no to. «Kaŋ ma ya go myanaŋgal ge Bageɗiŋ-nedin ne kwane nama, ko ɓyalar ge na dulwak ne sḛ́ nama sen ma: ndu ge jegreya, ne wak ge ne kun hale, ndu ge ne hun siya baŋ ɗaɗar, dulwak ge ne dwat ker ya̰l, koo ge ne har tene mbo ker ya̰l, ndu ge ne ke sayda ge hale, ndu ge ne tol gool ná vya ma buwal zi me.» Fare sḭ ma 6 :16-19 Ndu ge son e naa ke gool, ndu ge or naa e na kondore ma varseya.» Fare sḭ ma 16 :28
Ne son mbe ma no kwaɗa lwak ge ne njaŋge ne maktub mbe no zi ma, ndu ya go ɗu ge ne há kaŋ mbe ma no pal pet, na dḭl Jesu-Krist. A na ɗu kikit ge ne mbya hon ndu dasana pool ge hal bage ho̰l Saytan ne na zwama ma ne. Ge uwara kaŋgre pal Jesu-Krist jya̰ go : « … kaŋ ma pet nama wak wi ya go …» Kaŋ ma pet nama wak wi go, a̰me ge gwan vḛne ndu dasana to, ne da pe, Jesu hé sone ma pet na pal, ndé uwara kaŋgre digi ne nama no. Jesu hat ndu dasana ya suli ne son ge bage ho̰l ne go. Kadɗa mo hon fareba ya Jesu ta, mo hal sone ya hal zo, ne jo̰ maktub ge Dok jan go : « … ago na ge ne aŋ zi waɗe na ge ne dunya zi da ne ga̰l.» 1 Yohana 4 :4 Jesu waɗe Saytan waɗe, hál na ya go ne mo pe, ago mo ho̰ fareba Jesu ta mo ba hál na me. Ne jo̰ kaŋ dunya ma ne kaŋ ge bage ho̰l ne ma pet a mbo kale uzi, amma bage ne yá̰ na saareya Dok pal mbo kat ne ndwara ɗiŋ-nedin. A na no maktub jan no go : «Ndi kaŋ ge dunya ne ma : Ene ge sḛ duur ne, ene ge ndwara fa̰ ne, ne jegreya ge kaŋ ɓolla ge dunya ne ma. Ago kaŋ mbe ma no a ge Báá ne ne to, amma ge dunya ne ne. Ago dunya kale kale ne na kaŋ kwaɗa ma pet, Amma bage ne ke laar ɓyareya ge Dok ne da ne ndwara ɗiŋ-nedin.» 1 Yohana 2 :16-17
Jesu jan go : «…Mbi viya̰, mbi fareba, mbi ndwara, bage mbo ya Báá ta to say mbi ta.» Jesu a viya̰ ge ne gene ndu mbo Dok ta ya ne. Ndu ge ne hé viya̰ ge dosol, det swaga ge dosol go. Jesu a viya̰ ge dosol ne. Na sḛ a fareba ne, vuuɗiya, ko varseya, ko hale, ko kaŋ ge seŋgre ge daage pet ne na ta to. Uwale, Jesu jan go na ndwara ne, ndu ge ne hon fareba ya na ta ban uzi to, amma ɓol ndwara ge ɗiŋ-nedin.
Bayamy Tchande Awakde
Email: bayamy.tchande@gmail.com // bayamy@biblesocieties.org
Tel: (+235) 66381519/ 99139107
Illustration ©BELT TS 1
Décembre 2010
