Ma̰ no Dok far nee wak .....
Maana ge Baybul zwagreya wak kwasap mbo da ne swaga kaal ya, na fare pe wanna twala. Kadɗa ma̰ no nee ke vḛso ge baybul wak kwasap ne ɗe, nee da ne pool jan go na bobo, ko ne kwa a̰se ge Dok ɗeŋgo.
Swaga ge nee bá ma ne ka ne dwatɗa ge zwagre baybul wak kwasap, ka del 1958 go, go̰r swaga ge Wak tuli ge giya̰l ne wá ya zum del 1955 go. Ne swaga mbe ya day temel ma be zam zḛ to ne fare ma pe hini hini pe. A del 1997 go ge ESDRAS (ɓan pala ge kwasap vya ma ne ge a ne é dwatɗa ge bama ne zi ne temel ge Bageyal ne mbo zḛ pe) hé temel mbe na tok no, zwagre naa ge temel ma ne suwal Koyma ya mbo ya Ndjamena diŋ no ne da pe bama ba dol ndwara temel ma pal kwaɗa. A é pe sal kwasap vya laar ne temel mbe pe inna, ndwara temel ge wak zwagreya ne, a é naa (comite) ne ndil temel mbe pe no me.
Temel é pe zam zḛ kwaɗa del 2002 go swaga ge ná vya BAYAMY Tchande Awakde ne á ne na hateya ya, ndwara go Exegete, mbo her ná vya ADANGSA Piatene Obed tok digi no, ne go̰r go ná vya DONO Michel wá ya temel zi no me. A temel del 11 go̰r go ná vya ma zwagre wak tuli ge zaŋgal no, a gwan ndil wak tuli ge giya̰l no me.
Nee ke laar saal ne temel ge Bageyal ne vḭ tene go na ke nà swaga ma go tem no pe ne kim ma pe. A fareba, ma̰ no Dok far nee fare da ne nee wak, a ndu a̰me jya̰ fare mbe ne ndwara ŋgay laar saal ge na ne swaga ge ne wa̰ na baybul na tok zi go. Ndu ge may jya̰ go na da ne pool ma̰ no na hon na baybul wak saal uzi, ago swaga isi na go na wan fare ma pe pet to.
Laar saal ka wiya tap dam 12 ge saba Somo ge del 2015 mbe ne go. Kwasap vya ge ne zum ya ma ko ge ne suwal diŋ ma a mbo ɓol ta pet ge suwal kwasap diŋ ne dam 1 ge saba somor ne go ɗiŋ mbo ga̰l ge vḛso mbe ne go. Ne naa ge njaŋge kaŋ ma buwal zi, ndu a̰me jyá̰ go, naa ge ne dé ya vḛso mbe go ma mbo kaŋ ge naa dudubu ɓyalar go. Naa ka ɓase ge be to, naa pool ga̰l, ne naa zaab ga̰l, ne dore ma, ne kale ma ɓanna ne naa jabso, ne sabar ma, pet a mbo ne swaga ma ya hini hini ne vḛso ge Baybul ne pe. Ne jo̰ ka iyalam zi, detɗa ge otoro ge ne genne baybul ya kwasap diŋ ne dé ya ɗaal no puy ɗe be tele naa be ge mbo ya kun baybul to. Naa ge uware Dok ne kaŋ mballa ma, ge é lulu ma, ge é suŋri ma, naa titɗa memet kuci naa pal swaga kun baybul suwal diŋ go.
Ago, naa da̰re del 57 baybul ɗage zut ya zum no, no a kaŋ ge ne é naa ker laar saal gḛ ne. Bware ge ne ke temel le ga̰l a kwasap vya ma sḛ ho̰ na ne, da ne pe vḛso ge baybul wak kwasap ne ka vḛso ge ga̰l no ne uware Dok dḭl pe, na ge ne hage viya̰ go kim ma ɓo baybul ne bama wak. Vḛso mbe ke kwaɗa ne da pe ndu ge daage ho̰ tene, ne hon na tok pe ne temel mbe pe.
Kaɗeya ge i ne ago baybul mbe na ka kaŋ ge ɓan kim ma digi, swaga isi na go ko swaga za̰ na isiya na dé ya er dulwak ndu ge daage ne fareba ge Dok ne pal. Uwareya hon Dok, Dok ge pool gḛ, Bage kwa naa a̰se ne baybul no pe!
